काठमाडाैँ । चितवनमा दुई वर्षदेखि लागत मूल्यभन्दा कममा चल्ला बिक्री गर्न बाध्य हुँदै आएका ह्याचरी उद्योगहरूले अहिले आएर राहत महसुस गरेका छन् । हाल ब्रोइलर र लेयर्स दुवै प्रकारका चल्लाको बिक्री मूल्य लागत मूल्यको स्तरमा पुगेपछि उद्योग सञ्चालनमा सुधार देखिएको छ ।
नेपाल ह्याचरी उद्योग सङ्घका केन्द्रीय अध्यक्ष राजेन्द्र लामिछानेका अनुसार हाल ब्रोइलर चल्ला प्रतिवटा रु ९० र लेयर्स चल्ला रु १६० मा बिक्री भइरहेका छन् । ब्रोइलर चल्लाको लागत मूल्य करिब रु ६५ र लेयर्सको रु १२० पर्न आउँछ । लामो समय घाटामा सञ्चालन गर्नुपरेका उद्योगहरूलाई अहिलेको मूल्यले केही राहत दिएको उनले बताए ।
यसअघि झण्डै दुई वर्षसम्म चल्ला लागतभन्दा निकै सस्तोमा बिक्री गर्नुपर्ने अवस्था रहेको थियो । कतिपय अवस्थामा ब्रोइलर चल्ला प्रतिवटा रु २५ सम्ममा बेच्नुपर्ने बाध्यता समेत रहेको उद्योगीहरूको भनाइ छ । लगातार घाटा बढेपछि केही ह्याचरीहरूले उत्पादन नै रोक्नुपर्ने अवस्था आएको थियो भने केही उद्योग अस्थायी रूपमा बन्दसमेत भएका थिए ।
अध्यक्ष लामिछानेका अनुसार उत्पादन घट्दै जाँदा बजारमा आपूर्ति कम भएको र भारततर्फबाट चल्ला आयातमा कडाइ गरिएपछि स्वदेशी उत्पादनले बजार पाउन थालेको हो । भारतमा चल्लाको मूल्य तुलनात्मक रूपमा बढी रहेको र सीमा क्षेत्रमा कडाइ भएपछि नेपाली उत्पादनले प्रतिस्पर्धात्मक लाभ पाएको उनले बताए ।
हाल करिब १०० वटा ब्रोइलर र १० वटा लेयर्स ह्याचरी सञ्चालनमा छन् । ती उद्योगबाट साप्ताहिक रूपमा लेयर्स चल्ला करिब १ लाख र ब्रोइलर चल्ला करिब ३० लाख उत्पादन भइरहेको छ । यसअघि अत्यधिक उत्पादनका बेला साप्ताहिक रूपमा ब्रोइलर चल्ला ४२ लाखभन्दा बढी र लेयर्स चल्ला करिब ३ लाख ५० हजारसम्म उत्पादन हुने गरेको थियो ।
बजारमा असन्तुलन, मूल्य गिरावट र लागतभन्दा कम मूल्यका कारण धेरै साना कुखुरापालक किसान विस्थापित भइसकेका छन् । पछिल्लो समय भने ठूला व्यावसायिक फार्महरू विस्तार हुँदै गएका छन्, जहाँ एकै किसानले सात लाखसम्म ब्रोइलर कुखुरा पालन गर्ने गरेका छन् ।
उद्योगीहरूले अवैध रूपमा हुने सीमा व्यापार नियन्त्रण भएमा स्वदेशी पोल्ट्री उद्योग थप सुदृढ हुने बताएका छन् । लामिछानेका अनुसार लामो समयदेखि उठाइँदै आएको यो विषयमा सरकारले कडाइ गर्नुपर्ने आवश्यकता छ ।
