काठमाडौँ। नेपाल कम्युनिष्ट पार्टी (एमाले) का कार्यकर्ताबाट दुर्व्यवहारमा परेका एक ज्येष्ठ नागरिकलाई भेट्न गृहमन्त्री सुधन गुरुङ उनकै निवास पुगेका छन्।
केही दिनअघि एमाले कार्यकर्ताहरूले आफ्ना पार्टी अध्यक्ष केपी शर्मा ओली पक्राउको विरोधमा नारा लगाउँदै हिँड्ने क्रममा एक ज्येष्ठ नागरिकमाथि दुर्व्यवहार गरेको भिडियो सामाजिक सञ्जालमा भाइरल भएको थियो।
उक्त घटनापछि गृहमन्त्री गुरुङकै निर्देशनमा ललितपुर प्रहरीले दुर्व्यवहारमा संलग्न राम शरण शर्मा बजगाईंलाई नियन्त्रणमा लिएको छ। हाल उनलाई जिल्ला प्रहरी परिसर ललितपुरमा राखेर थप अनुसन्धान भइरहेको जनाइएको छ।
यसैबीच गृहमन्त्री गुरुङले ललितपुरस्थित पीडित ज्येष्ठ नागरिकको निवासमा पुगेर भेट गरेका छन्। आफू पीडित हुँदा गृहमन्त्रीले तुरुन्तै एक्सन लिएर साथ दिएको भन्दै ज्येष्ठ नागरिकले धन्यवाद व्यक्त गरेका छन्।
गृहमन्त्री गुरुङले उक्त घटनाले आफूलाई निकै दुःखी बनाएको र निदाउनसमेत नसकेको उल्लेख गर्दै तुरुन्तै कारबाही अघि बढाइएको बताएका छन्।
