बार्सिलोनाले च्याम्पियन्स लिगमा सहज जित हासिल गरेको छ । बुधबार राति भएको खेलमा बार्सिलोनाद्वारा बोरुसिया डर्टमण्ड ३–१ ले हारेको हो । लियोनल मेस्सीले बार्सिलोनाका जर्सीमा ७ सयौ खेल खेल्दा बार्सिलोना च्याम्पियन्स लिगको नकआउट चरणमा पुग्न सफल रह्यो ।बार्सिलोनालाई जित दिलाउन लुईस स्वारेज, मेस्सी र एन्टोनी ग्रिजम्यानले समान एक एक गोल गरेका थिए । यता डर्टमण्डका लागि भने जाडोन साञ्चोले एक गोल फर्काएका हुन् ।
बार्सिलोनाले २९ औ मिनेटमा स्वारेजको गोलबाट खेलमा अग्रता लिएको थियो । मेस्सीको पासलाई सदुपयोग गर्दै स्वारेजले बार्सालाई अग्रता दिलाएका हुन् । चार मिनेटपछि नै फेरी मेस्सीले घरेलु टोली बार्साको लागि गोल थप्दै अग्रता दोब्बर पारेका थिए । क्लबका लागि ६ सय १३ गोल गर्न मेस्सी सफल रहेका छन् ।
फेरीपनि मेस्सीकै पासलाई सदुपयोग गर्दै ६७ औ मिनेटमा ग्रिजम्यानले बार्सिलोनाका लागि तेस्रो गोल गरे । युवा स्टार सान्चोले ७७ औ मिनेटमा पाहुना टोलीका लागि एक गोल फर्काएका हुन् ।समूह एफको शीर्ष स्थानको बार्सिलोनाले ५ खेलबाट ११ अंक जोड्यो । डर्टमण्ड ७ अंक सहित तेस्रो स्थानमा रह्यो ।
