स्पेनिस ला लिगा फुटबलमा उपाधि दाबेदार रियल मड्रिडले फराकिलो जित निकालेको छ । बुधबार राति भएको खेलमा लेगानेसलाई ५-० गोलको फराकिलो अन्तरले रियलले हराएको हो । घरेलु मैदानमा भएको खेलमा रियललाई जित दिलाउन रोड्रीगो, टोनी क्रुस, सर्जियो रामोस, करिम बेन्जिमा र लुका जोभिकले एक एक गोल गरे । सान्टियागो बेर्नाबेउमा एकतर्फी जित निकाल्ने क्रममा रियलले सातौं मिनेटमा रोड्रीगोको गोलबाट अग्रता बनाएको थियो ।
आठौं मिनेटमा क्रुसले गोल गर्दा रियल २-० ले अघि रह्यो । रामोसले २४ औं मिनेटमा पेनाल्टीमा गोल गर्दा पहिलो हाफमा रियल ३-० ले अघि रह्यो । ६९ औं मिनेटमा बेन्जिमाले पेनाल्टीमा गोल गर्दै रियललाई ४-० को अग्रता दिलाए । त्यसपछि जोभिकले खेलको ९० औं मिनेटमा गोल गर्दा रियल ५-० ले बिजयी भयो ।
जितसँगै रियल लिगको दोस्रो स्थानमा उक्लिएको छ । रियलले शीर्ष स्थानको बार्सिलोनासँगको अंक दुरी १ अंकमा घटाएको छ । दोस्रो स्थानको रियलले १० खेलमा २१ अंक जोडेको छ । बार्सिलोनाको २२ अंक छ । लेगानेस ५ अंक जोडेर पुछारमा रहेको छ ।
