इन्ग्लिश प्रिमियर लिग फुटबलमा चेल्सीले सहज जित निकालेको छ । शनिबार राति भएको खेलमा बर्नलीलाई ४–२ गोल अन्तरले चेल्सीले पराजित गरेको हो । बर्नलीको मैदानमा चेल्सीलाई जित दिलाउनका लागी क्रिस्टियन पुलिसिचले ह्याट्रिक गरेका हुन् । यस्तै विलियमले एक गोल थपेका थिए ।
घरेलु टिम बर्नलीका जय रोड्रीगेज र म्याकनिलले एक एक गोल फर्काए । खेलको २१ औं मिनेटमा पुलिसिचले गोल गर्दै चेल्सीलाई अग्रता दिलाए । खेलको ४५ औं पुलिसिचले चेल्सीका लागि दोस्रो गोल गरे । ५६ औं मिनेटमा पुलिसिचले ह्याट्रिक पुरा गर्दै चेल्सीलाई ३–० को अग्रता दिलाए । बर्नलीसँग ह्याट्रिक गरेसँगै पुलिसिच प्रिमियर लिगमा ह्याट्रिक गरे दोस्रो अमेरिकन खेलाडी बनेका छन् ।
विलियमले खेलको ५८ औं मिनेटमा गोल गर्दा चेल्सी ४–० ले अघि रह्यो । खेलको ८६ औं मिनेटमा रोड्रीगेजले गोल गर्दै बर्नलीलाई खेलमा फर्काउने कोशिस गरेका थिए । ८९ औं मिनेटमा म्याकनिलले थप एक गोल फर्काएपनि घरेलु टिम ४–२ ले पराजित भयो । चेल्सीले १० खेलमा २० अंक जोड्दै लिगको चौथी स्थानमा उक्लिएको छ । १२ अंक जोडेको बर्नली ११ औं स्थानमा पुगेको छ ।
