ललितपुर – ललितपुर महानगरपालिकाका प्रमुख चिरिबाबु महर्जनले स्थानीय तहमा हुने विकास निर्माणका कार्यहरुमा जनतासँग हातेमालो गरेर अघि बढ्न महानगरपालिका सदैब तयार रहेको बताउनुभएको छ ।
महानगरपालिकाको वडा नं. १८ को भैंसेपाटी, मगरगाउँमा बिहीबार आयोजित सडक निर्माणको अवलोकन एवं प्रगति विवरण सार्वजनिक कार्यक्रममा प्रमुख महर्जनले कुनै दल विशेषप्रति आग्रह राखेर विकासका कार्यमा पूर्वाग्रह नगर्ने प्रतिबद्धता व्यक्त गर्नुभयो ।
उहाँले भन्नुभयो, “मेरो नियत सफा छ, मलाई झेली गर्नु छैन । २ र २ जोडेर ५ भन्नु छैन, मेरो दृष्टिमा २ र २ जोड्दा ४ नै हुन्छ ।”
प्रमुख महर्जनले नगरको विकासका काममा दलीय रुपमा कुनै विवाद र पूर्वाग्रह आफूले नराखेको सुनाउँदै महानगर प्रमुख महर्जनले भन्नुभयो, “मेरो २० महिनाको कार्यकालमा ६४ वटा बैठक सञ्चालन भइसके । राजनीतिक रुपमा आफू अल्पमतमा रहे पनि एउटा पनि विवाद छैन, झैझगडा भएको छैन ।”
“मलाई कुनै किसिमको लपनछपन गर्नु छैन । एउटा झुट लुकाउन धेरैवटा झुट काम गर्नुपर्छ, बोल्नुपर्छ । त्यसर्थ त्यस्तो काममा किन लाग्ने ? मेरो धारणा स्पष्ट छ, खुलस्त रुपले काम गर्नु मेरो पहिलो प्राथमिकता हो” उहाँले भन्नुभयो ।
मगरगाउँ पिपलबोट सडक निर्माण उपभोक्ता समितिले गरेको सडक निर्माणको कामबाट आफू निकै खुशी भएको बताउँदै प्रमुख महर्जनले भन्नुभयो, “राम्रो काम गर्नुहोस्, पैसाको कुनै दुःख हुँदैन । म पनि छिटोछिटो गुणस्तरीय काम होस् भन्छु, तर यहाँ धेरै ब्रेकर रहेछन् ।”
त्यस अवसरमा प्रमुख महर्जनलाई खड्कागाउँ शिवमन्दिरदेखि मगरगाउँ पिपलबोटसम्मको सडकमा ढल र सडक निर्माणमा महानगरपालिकाबाट आवश्यक सहयोग उपलब्ध गराउन आग्रह गरिएको थियो ।
सो अवसरमा वडा नं. १८ का वडा अध्यक्ष पुरुषोत्तम खड्काले स्थानीय विकास निर्माणमा पूर्ण पारदर्शिता अपनाएमा बजेटको अभाव नहुने विश्वास दिलाउनुभयो ।
मगरगाउँ पिपलबोट सडक निर्माण उपभोक्ता समितिको अगुवाईमा मगरगाउँदेखि सानो खोकनासम्मको सडक निर्माण सम्पन्न भएको छ । उक्त सडक निर्माण गर्न महानगरपालिका र स्थानीय उपभोक्ताको चन्दाबाट करिब ३२ लाख प्राप्त भएको समितिले जनाएको छ । यस सडकको निर्माणबाट मगरगाउँदेखि सानो खोकनासम्म ओहोरदोहोर गर्न सहज भएको छ ।
उक्त समारोहमा कार्यक्रमका सभापति एवं उपभोक्ता समितिका अध्यक्ष रविन्द्र थापा, जयराम थापा, हरिकुमार थापा लगायतले समितिले गरेका कार्यहरुका बारेमा चर्चा गर्नुभएको थियो ।
