काठमाडौं । पोर्चुगिच फुटबल स्टार फरवार्ड क्रिस्टियानो रोनाल्डोले खेलको दुई मिनेट समय बाँकी रहँदा गरेको पेनाल्टी गोलको मद्धतले इटालियन सिरी एमा युभेन्टस विजयी भएको छ । आइतबार राति भएको खेलमा युभेन्टसले लाजियोलाई २–१ ले पराजित गर्यो ।
खेलमा एक गोलले पछाडि परेको युभेन्टसले अन्तिम १६ मिनेटमा दुई गोल गर्दै लिगमा अपराजित यात्रा कायमै राखेको हो । निकै प्रतिष्पर्धात्मक खेलको पहिलो हाफमा दुवै टोलीले गोल गर्न सकेनन् ।
दोस्रो हाफमा लाजियोले अग्रता लियो । ५९ औं मिनेटमा इम्रे च्यानले आत्मघाती गोल गरेपछि घरेलु टोली लाजियोलाई फाइदा भयो ।
७४ औं मिनेटमा जोआओ क्यान्सलोले बराबरी गोल गर्दै युभेन्टसलाई खेलमा फर्काए । खेलको दुई मिनेट समय बाँकी रहँदा युभेन्टसले पेनाल्टी हान्ने मौका पायो । रोनाल्डोले पेनाल्टीमा कुनै गल्ती नगरी युभेन्टसलाई जिताए ।
रोनाल्डोको यो सिजनको १७ औं लिग गोल हो । जितसँगै शीर्षस्थानमा युभेन्टसले ११ अंकको अग्रता कायम गर्न सफल भएको छ । युभेन्टसले २१ खेलमा ५९ अंक जोड्दा दोस्रो स्थानमा रहेको नेपोलीको ४८ अंक छ । एजेन्सी
आइतबार रातिको नतिजा
चिभो ३–४ फियोरेन्टिना
एटलान्टा ३–३ रोमा
बोलाग्ना ०–४ फ्रोसिनोन
पार्मा २–३ एपिएल
टोरिनो १–० इन्टर
