काठमाडौँ । पोखराबाट जोमसोम उडेको तारा एयरको ९ एन एईटी ट्विनअटर विमान सम्पर्कविहीन भएको छ । बिहान ९ बजेर ५५ मिनेटमा पोखराबाट उडेको जहाज म्याग्दीको लेते पहाड पुगेपछि टावरसँग सम्पर्क टुटेको हो ।
क्याप्टेन प्रभाकर घिमिरेसँग काम गरेका एक पाइलटले न्यूजपोलारसँग भन्नुभयो, “उहाँ एकदमै अनुभवी र उड्डयन सुरक्षामा ध्यान दिने व्यक्ति हो । मौसमको अवस्थामा ढुक्क भएपछि मात्र उडान गर्ने स्वभाव उहाँमा छ ।”
लेते नजिक पुगेपछि १२ हजार ८०० फिटको उचाइमा निकै बाक्लो बादल रहेको कारण घिमिरेलले विमानलाई पोखरा तर्फ डाइभर्ट गराउने प्रयास गर्नुभएको हुन सक्छ ।
तारा एयरको सो विमानभन्दा केही समयअघि मात्र समिट एयरको विमान जोमसोमका लागि उडान गरेको थियो । ती पाइलटका अनुसार समिट एयरको पाइलटले मौसमको बारेमा जानकारी गराए लगत्तै त्यस क्षेत्रमा बाक्लो बादलले ढाकेको हुनुपर्छ ।
यसैबीच हराएको सो विमान खोज्न गएको फिस्टेल एयरको हेलिकप्टर प्रतिकूल मौसमका कारण फिर्ता भएको छ ।
