एजेन्सी । मंगलबार राति यस्तो खबर आयो, जसले फिल्म इन्डस्ट्री जगतका मानिसको आँखा मात्र रसाएको छैन, सिंगो भारत र विदेशमा समेत रहने उनका सम्पूर्ण फ्यानहरुलाई स्तब्ध बनाएको छ ।
‘गायक केके रहेनन् ।’ यी शब्दहरूले आज धेरै मानिसहरूको हृदय तोड्यो । लाइभ कन्सर्टमा ‘हम रहे या न रहें कल’ गीत गाउँदै गर्दा यी गायकले साँच्चै यो संसार छाड्छन् भन्ने कसैले सोचेका थिएनन् ।
यो खबर पढ्ने, हेर्ने जो कोहीले लाइभ कन्सर्टमा के भयो जसले आफ्नो मनपर्ने गायक गुमाए भनेर सोचिरहेको हुनुपर्छ । आखिर, गायकले यस संसारलाई बिदा दिँदाको अन्तिम क्षण कस्तो रह्यो होला । यसबारे चर्चा गरौँ ।
गायक कृष्णकुमार कुननाथ उर्फ केकेको कोलकाताको गुरुदास कलेजको फेस्टमा प्रस्तुति दिने क्रममा अचानक स्वास्थ्य बिग्रियो । दर्शकलाई मनोरञ्जन दिँदै गायक बारम्बार आफ्ना सहकर्मीहरूलाई आफ्नो स्वास्थ्यको बारेमा बताइरहेका थिए । तर दर्शकको मनोरञ्जनमा कुनै कमी भएन, जसका कारण उनले कहिले तौलियाले मुख पुछे, कहिले पानीको बोतल उठाए त कहिले स्टेजमा घुमेर आफ्नो प्रस्तुति जारी राखे ।
जब धेरै समस्या भयो, उनले निर्माताहरूलाई स्पटलाइट बन्द गर्न भने । साढे आठ बजे लाइभ कन्सर्ट सकेर केके होटल फर्के । तर, यहाँ पनि उनलाई आराम मिलेन र उनी एक्कासी ढले । त्यसपछि करिब १०ः३० बजे उनलाई कलकत्ता मेडिकल रिसर्च इन्स्टिच्युट (सीएमआरआई) लगियो, जहाँ उनलाई मृत घोषित गरियो । त्यसबखत अस्पतालका वरिष्ठ चिकित्सक, प्रशासनिक अधिकारी र प्रहरी वरिष्ठ अधिकारीहरुको उपस्थिति रहेको थियो ।
उनको निधनमा भारतका थुप्रै राजनीतिज्ञ, कलाकार, गायकहरुले समवेदना प्रकट गरेका छन् । उनको ‘तडप तडप’, ‘तु जो मिला’, ‘दिल इबादत’, ‘लबों को’, ‘खुदा जाने’, ‘आवारापन बन्जारापन’, लगायत सयौँ गीतहरु सुपरहिट छन् ।
‘असामान्य मृत्यु’ मुद्दा दर्ता
चर्चित गायक केकेको मृत्युपछि प्रहरीले मुद्दा दर्ता गरेको छ । स्रोतका अनुसार प्रहरीले ‘असामान्य मृत्यु’ को मुद्दा दर्ता गरेको छ । केकेको अनुहार र टाउकोमा चोटको निशान भेटिएको मिडिया रिपोर्टमा दाबी गरिएको छ । प्रहरीले आयोजक र होटलका कर्मचारीलाई सोधपुछ गर्न सक्ने बताइएको छ ।
