इङ्लिस प्रिमियर लिगमा संघर्षरत म्यान्चेस्टर युनाइटेडका दुई प्रभावशाली खेलाडी क्लबबाट बिदा हुने भएका छन् ।
समाचार अनुसार, क्लबबाट फ्रान्सेली अन्तरराष्ट्रिय खेलाडी पल पोग्बा र स्पेनी खेलाडी हुवाँ माटा आगामी सिजनबाट बिदा हुँदैछन् ।
यी दुई खेलाडी क्लबमा मिडफिल्डरका रुपमा खेल्दै थिए । पछिल्लो सिजनमा एक दुई वटा मात्र म्याच खेलेका हुवाँ माटा अधिकांश समय बेन्चमै रहेका थिए । उनलाई बिदा गरिएको क्लबले जनाएको छ ।
यस्तै पल पोग्बाको पनि म्यान्यूले करार नवीकरण गर्न अस्वीकार गरेको छ । उनको करार यही जुन महिनाको अन्त्यमा समाप्त हुँदैछ । उनी सन् २०१६ मा इटालियन क्लब युभेन्टसबाट झण्डै ११ करोड डलरमा म्यान्चेस्टर युनाइटेड आएका थिए ।
चोट र राम्रो फर्म नभए पछि पोग्बाले गत सिजनमा २७ वटा खेल मात्र खेलेका थिए । क्रिस्टियानो रोनाल्डो जस्ता विश्वस्तरीय खेलाडी भित्र्याए पनि म्यान्चेस्टर लिगको अंक तालिकामा छैटौं स्थानमा रहेको छ भने च्याम्पियन्स लिग खेल्ने मौका गुमाएको छ ।
