काठमाडौँ । अमेरिकी सेनाको एसिया–प्रशान्त क्षेत्र प्रमुख जनरल चार्ल्स ए फ्लिनले राष्ट्रपति विद्यादेवी भण्डारी र रक्षामन्त्रीको समेत कार्यभार सम्हालेका प्रधानमन्त्री शेरबहादुर देउवासँग शिष्टाचार भेट गर्दैछन् ।
त्यस्तै उनले आजै सैनिक मुख्यालयमा प्रधानसेनापति प्रभुराम शर्मासँग द्विपक्षीय भेटवार्ता गर्ने नेपाली सेनाले जनाएको छ । अमेरिकाले नेपाली सेनासँग हस्ताक्षर गर्न चाहेको स्टेट पार्टनरसिप प्रोग्राम (एसपीपी) सम्बन्धी समझदारीपत्र टुंग्याउनेबारे फ्लिनले उच्चतहमा कुराकानी गर्न सक्ने बताइएको छ ।
अमेरिकी दूतावासले कान्तिपथस्थित फोरा दरबारमा आयोजना हुने प्रवचन कार्यक्रममा अमेरिकाको नेपालसँगको परम्परागत सैन्य सम्बन्ध र क्षेत्रीय तथा अन्तर्राष्ट्रिय परिस्थितिबारे फ्लिनले व्याख्या गर्ने समेत कार्यक्रम रहेको छ ।
उनलाई नेपाली सेनाले सैनिक मञ्च टुँडिखेलमा गार्ड अफ अनर पनि दिइने सेनाले बताएको छ।
यसैबीच माओवादी केन्द्रले अमेरिकी सैनिक जनरलको नेपाल भ्रमणप्रति आशंका व्यक्त गरेको छ । विशेषगरी माओवादी केन्द्रले नेपाल र अमेरिकाबीच स्टेट पार्टनरसिप प्रोग्रामको सम्झौता हुन लागेको र उक्त सम्झौतामार्फत नेपाल सैनिक र रणनीतिक कार्यक्रमहरुमा जोडिन खोजेको हो कि भन्ने आशंका गरेको छ ।
बिहीबार प्रतिनिधिसभाको बैठकमा माओवादी केन्द्रका सांसद गिरिराजमणि पोखरेलले अमेरिकी सैनिक र रणनीतिक कार्यक्रममा नेपाल जोडिन खोजको हो भनी सरकारलाई प्रश्न गरेका थिए ।
सरकारले नेपाल र अमेरिकाबीच हुन लागेको सैन्य भ्रमणको उद्देश्य र एजेण्डाबारे सदनलाई जानकारी गराउनुपर्ने उनको माग थियो।
