फ्रान्सेली राष्ट्रपति इमानुएल म्याँक्रो, जर्मनीका चान्सलर ओलाफ शोल्ज र इटालीका प्रधानमन्त्री मारिओ ड्रागी युक्रेनको राजधानी किभ पुग्नु भएको छ ।
रुसको आक्रमणबाट आक्रान्त भइरहेको युक्रेनलाई आर्थिक, सैनिक तथा अन्य सहायता प्रदान गरिरहेका युरोपेली तीन देशका नेताहरु युक्रेनको वस्तुस्थिति बुझ्न युक्रेनको राजधानी किभ पुग्नु भएको हो ।
उहाँहरुले युक्रेनी राष्ट्रपति भोलोदिमर जेलेन्स्कीसँग सामूहिक भेटवार्ता गर्नु हुनेछ । भेटका क्रममा उहाँहरुले युक्रेनलाई सहयोग र समर्थन गर्ने बताइएको छ ।
तीनै नेताहरु पोल्यान्डबाट रातीको रेलवे सेवा मार्फत किभ पुग्नु भएको थियो । युक्रेनी राष्ट्रपति जेलेन्स्कीले युरोपका ठूला देशहरु जर्मनी, फ्रान्स र इटालीले चाहेजति सहयोग नपाएको गुनासो गर्दै आउनु भएको थियो ।
रोयटर्स समाचार संस्थाका अनुसार, फ्रान्सेली राष्ट्रपति म्याँक्रोले आफूहरु ऐक्यबद्धता जनाउन किभ आइपुगेको प्रतिक्रिया दिनु भएको छ ।
