काठमाडौँ । पूर्वपरराष्ट्रमन्त्री सुजाता कोइरालाले संसदीय समितिमा छलफलका लागि प्रधानसेनापतिलाई बोलाएकोप्रति आपत्ति प्रकट गर्नुभएको छ ।
संसद्को अन्तर्राष्ट्रिय सम्बन्ध समितिले शुक्रबार अमेरिकाको स्टेट पार्टनरसीप प्रोग्राम (एसपीपी) सम्बन्धमा छलफल गर्न प्रधानसेनापति प्रभुराम शर्मालाई बोलाएको थियो ।
नेत्री कोइरालाले एसपीपीसम्बन्धमा प्रधानमन्त्री शेरबहादुर देउवा, परराष्ट्रमन्त्री डा नारायण खड्का र स्वयं प्रधानसेनापति शर्माले स्पष्ट पार्दासमेत प्रधानसेनापतिलाई संसदीय समितिको बैठकमा बोलाउनु आपत्तिजनक भएको बताउनुभयो ।
मुलुकको प्रधानसेनापतिलाई यसरी समितिको बैठकमा बोलाउँदा कारबाही गरेजस्तो भएको भन्दै उहाँले यस्ता क्रियाकलापबाट अरु मुलुकले के भन्छन् भनी प्रश्न गर्नुभयो ।
धेरै राष्ट्रवादी कुराले मुलुकको विकास हुँदैन भन्दै उहाँले समितिमा धेरै राष्ट्रवाद देखिएको टिप्पणी गर्नुभयो । नेपाली सेना चीन पनि गएको छ तर सोबारे कुनै कुरा नहुने गरेको उहाँले बताउनुभयो । “जब भारत र अमेरिकाको कुरा आउँछ, अनि नेपाल अफगानिस्तान बन्छ भनिन्छ”, उहाँले प्रश्न गर्नुभयो, “यस्तो आशंका किन गरिन्छ ?”
यद्यपि समितिका सभापत पवित्रा निरौला खरेलले एसपीपीका सम्बन्धमा सडक र संसदमा नै कुरा उठिसकेपछि प्रधानसेनापतिलाई छलफलका लागि बोलाइएको भन्दै कारवाहीका लागि नभएको स्पष्ट पार्नुभयो ।
