काठमाडौँ । नेपाली कांग्रेसका महामन्त्री एवं सांसद गगन थापाले आज नेपाल राष्ट्र बैंकका गभर्नर महाप्रसाद अधिकारीलगायत वरिष्ठ अधिकारीहरुसँग भेट गर्नुभएको छ ।
भेटमा महामन्त्री थापाले हालको तरलता अभाव, मुद्रा सञ्चितिको अवस्था र पूँजी बजारको समस्या सम्बोधन गर्न आवश्यक विषयहरुमा छलफल गर्नुभएको सामाजिक सञ्जालमार्फत जानकारी दिनुभएको छ ।
उहाँले भन्नुभएको छ, “अर्थतन्त्रमा देखिएका यी लगायतका समस्या समाधानका उपायहरू सहित अबको मौद्रिक नीति तयार पार्नुहुनेछ भन्ने अपेक्षा लिएको छु।”
तिलक कोइरालाले अनशन तोड्ने
यसैबीच पूजीबजार सुधार र विकासका १९ बुँदे माग अघि सार्दै अनशन बस्नुभएका पूँजीबजार सुधार संघर्ष समितिका संयोजक कोइरालाले अनशन तोड्ने हुनुभएको छ ।
नेपाल धितोपत्र बोड (सेबोन) ले लगानीकर्ताका माग सम्बोधन गर्ने प्रतिबद्धता जनाएपछि उहाँले आजै अनशन तोड्नुहुने बताइएको छ । सेबोन कार्यालयबाहिर कोइराला १० दिनदेखि आमरण अनशन बसिरहनुभएको छ ।
लगानीकर्ताले उठाएका मागहरु कार्यान्वयन गर्न सेबोन र संघर्ष समितिबीच लगभग सहमति भएको जनाइएको छ। सेबोन अध्यक्ष र अनशनरत कोइरालाबीच मागहरु पूरा गर्ने सेबोनको प्रतिबद्धतापत्रमा हस्ताक्षर हुने बताएको छ ।
