एजेन्सी । तपाईले विश्वकै सबैभन्दा अग्लो भवन बुर्ज खलिफाबारे धेरैथोरै सुन्नुभएको होला । दुबईमा रहेको यो भवन अहिलेसम्म मानव निर्मीत संरचनामध्ये सबैभन्दा अग्लो भवन हो ।
यो भवन बन्नुभन्दा पहिले कसैले कल्पना पनि गरेका थिएनन् कि यति अग्लो भवन संसारमा निर्माण हुनेछ । यस भवनलाई निर्माण गर्न १२ हजार कामदारहरुले दिनरात मिहिनेत गरेका थिए । यस भवन निर्माणमा आवश्यक पर्ने कैंयौं मेशिन तथा क्रेनहरु छुट्टै निर्माण गर्नुपरेको थियो । यसको उचाई करीब ८३० मिटर अग्लो रहेको छ भने यसमा १६३ तला रहेका छन् ।
सन् २००४ जनवरी ६ मा दुबईको प्रोपर्टी डेभ्लपर (इएमएएआर)ले बुर्ज खलिफाको डिजाइनको जिम्मा अमेरिकाका आर्किटेक्चरहरु स्किडमोर ओइंग्स र मेरिललाई दिएका थिए । यसका साथै अर्का आर्किटेक्चर एड्रियन स्मिथलाई पनि यसको डिजाइन निर्माण गर्ने श्रेय दिइन्छ । बुर्ज खलिफाको कन्स्ट्रक्सनको काम दक्षिण कोरियन कम्पनी सामसुङ सी एण्ड टी कर्पोरेसनलाई दिइयो ।
काम सुरु भएको तीन वर्षमै यसले रेकर्ड राख्न सफल भयो । सन् २००८ अप्रिल ७ मा यो भवनले मानव निर्मीत सबैभन्दा अग्लो भवनको रेकर्ड राख्न सफल भयो । यस भवनलाई निर्माण गर्न कैंयौं रकम खर्च भएपछि अबुधावीका प्रेसिडेन्ट खलिफा बिन जायदसँग आर्थिक सहयोगको अपिल गरियो । यसभन्दा पहिले यो टावरको नाम बुर्ज टावर रहेको थियो ।
तर खलिफा बिनको आर्थिक सहयोगमा यस भवनलाई सम्पन्न गरेपछि उनकै सम्मानमा बुर्ज खलिफा नामाकरण गरियो । सन् २००८ अक्टुबरमा यस भवनको काम सम्पन्न भयो भने सन् २०१० जनवरी ४ मा यसको ओपनिङ गरियो ।
यस भवन निर्माण सम्पन्न हुँदा १.५ बिलियन डलर खर्च भएको थियो । तर केही मानिसहरु भने यो भन्दा बढी रकम खर्च भएको बताउँछन् । सन् २०१० मार्च १० मा यस भवनलाई आधिकारिक रुपमा विश्वको सबैभन्दा अग्लो भवन घोषणा गरियो । त्यसबेलादेखि यो रेकड यसै भवनको नाममा रहेको छ ।
