काठमाडौँ । संसद्मा प्रमुख प्रतिपक्षी दल नेकपा (एमाले) का अध्यक्ष केपी शर्मा ओलीले आज प्रतिनिधिसभाको बैठकलाई सम्बोधन गर्ने हुनुभएको छ ।
एमाले संसदीय दलका प्रमुख सचेतक विशाल भट्टराईका अनुसार समसामयिक विषयमा पार्टीको धारणा राख्न सभामुखसँग समय माग गरिएको छ । अध्यक्ष ओलीले अमेरिकाको स्टेट पार्टनरसीप प्रोग्राम (एसपीपी) लगायतका समसामयिक विषयमा बोल्नुहुने प्रमुख सचेतक भट्टराईले बताउनुभयो ।
ओली प्रधानमन्त्री भएकै बेलामा एसपीपीमा सहभागी हुन नेपाली सेनाले अमेरिकी दूतावासलाई पत्राचार गरेको सार्वजनिक भएको थियो । यद्यपि अध्यक्ष ओलीले सो पत्रको वैधानिकतामाथि नै प्रश्न उठाउँदै आउनुभएको छ ।
