काठमाडौँ । केही गम्भीर उजुरी परेपछि छानबिन गर्न न्यायपरिषद्ले बाँकेका जिल्ला न्यायाधीश श्यामसुन्दर अधिकारीलाई सर्वोच्च अदालतमा तानेको छ ।
पटकपटक आर्थिक स्वार्थ र लेनदेनका कारण न्यायसम्पादन नै प्रभावित भएको आरोपसहित न्यायाधीश अधिकारीमाथि उजुरी परेपछि छानबिन गर्न उहाँलाई परिषद्ले सर्वोच्च झिकाएको हो ।
बाँकेकी रुवी खानलाई पक्राउ गर्दा उहाँमाथि यान्त्रिक रुपमा पक्राउ अनुमति दिएको आरोप लागेको बताइएको छ । सर्वोच्च अदालतले नै न्यायाधीश अधिकारीमाथि न्यायसम्पादनमा सचेत नभएको टिप्पणी गरेको थियो ।
त्यस्तै अधिकारीमाथि सप्तरी जिल्ला अदालतमा हुँदा घुस खाएको आरोप पनि लगाइएको छ । उनको खातामा शंकास्पदरुपमा आठ लाख रुपैयाँ भेटिएपछि सर्वोच्च अदालतका न्यायाधीश सपना प्रधान मन्ललको इजलासले उनको बर्खास्तीको सिफारिस गरे पनि कार्यान्वयन भएको थिएन ।
