रवीन्द्र मिश्रले बालेनलाई भने – ‘जे गर्दै हुनुन्छ गज्जब गर्दै हुनुहुन्छ’

काठमाडौं । विवेकशील साझा पार्टीका निवर्तमान अध्यक्ष रवीन्द्र मिश्रले काठमाडौँ महानगरपालिकाका मेयर बालेन्द्र साहको समर्थन गरेका छन् ।

शनिबार सामाजिक सञ्जालमार्फत मिश्रले बालेनले अवैध संरचना भत्काएकोमा समर्थन जनाएका हुन् । यद्यपि, कानुन बमोजिम क्रियाकलाप गर्नुपर्ने उनको सुझाव छ ।

उनले भनेका छन्,  बालेन जी,
जे गर्दै हुनुहुन्छ, गज्जब गर्दै हुनुहुन्छ। नियम-कानूनको चाहिँ अलि ख्याल गर्नुहोला। अन्यथा फेरि पछि अदालतले काम रोकिदिन्छ। तपाईंले चाहेर पनि काम गर्न पाउनु हुन्न।
पार्किङ्ग स्थलको गलत प्रयोगसँगै, सम्पदा/नदी/बाटो/फुटपाथ/सार्वजनिक जमिनको अतिक्रमण, मापदण्ड/नक्शा विपरितका/तोकिएभन्दा अग्ला घरहरू सबैमा डोजर लगाउनै पर्ने छ।
नियम-कानूनको पालना गरेर तपाईंको अधिकार क्षेत्रभित्र पर्ने कसैलाई नछोड्नु होला। मैले नियम-कानूनमा किन जोड दिएको भने, हत्याराले हत्या गर्यो भनेर राज्यले हत्याराको हत्या गर्न मिल्दैन। चोरले चोर्यो भनेर राज्यले पनि चोर बाटो लिन मिल्दैन।
तपाईं राज्य हो। नियम-कानून तोड्नेहरू व्यक्ति हुन्। राज्यले नियम(कानूनको पालना नगर्दा नै आज देशको हविगत यस्तो भएको हो।