काठमाडौँ । अन्तर्राष्ट्रिय क्रिकेट काउन्सिल (आईसीसी) ले बलात्कार आरोप लागेका नेपाली राष्ट्रिय क्रिकेट टोलीका कप्तान सन्दीप लामिछानेमाथि चासो लिएको छ ।
एक १७ वर्षीय नाबालिग किशोरीले सन्दीपमाथि बलात्कार गरेको आरोप लगाउँदै प्रहरीसमक्ष किटानी जाहेरी दिएपछि आईसीसीले पनि सो घटनाबारे चासो देखाएको हो ।
यद्यपि सन्दीपले घटनामा आफ्नो संलग्नतालाई अस्वीकार गर्दै नेपाल क्रिकेट संघ (क्यान) सँग कानूनी उपचारमा सहयोग गरिदिन अनुरोध गरेका छन् ।
सन्दीप अहिले क्यारेबियन प्रिमियर लिग (सीपीएल) मा सहभागिता जनाउन वेस्ट इन्डिज (जमैका)मा छन् । सन्दीपबारे लागेको आरोपबारे सीपीएलले पनि जानकारी पाएको तर खेलमा कुनै असर नपर्ने बताएको जनाइएको छ ।
आईसीसीले भने उनलाई लागेको अभियोगबारे के हुनसक्छ भनी चासो राखेको बताइएको छ । बलात्कारसम्बन्धी आरोपप्रति आईसीसी पनि संवेदनशील भएको बुझिएको छ ।
