काठमाडौँ । चिनियाँ राष्ट्रिय जनकांग्रेसका अध्यक्ष ली झान्सु सोमबार काठमाडौँ आउँदै हुनुहुन्छ । त्रिभुवन अन्तर्राष्ट्रिय विमानस्थलमा उत्रनुहुने झान्सुका भ्रमणमा नेपाल र चीनबीच संसदीय तहमा सहकार्य गर्ने सहमति भएको बताइएको छ ।
सोमबार त्रिभुवन अन्तर्राष्ट्रिय विमानस्थलमा ओर्लिएपछि अध्यक्ष झान्सु सोल्टी होटल गएर बस्नुहुनेछ । सोही दिन सभामुख अग्निप्रसाद सापकोटासँग शिष्टाचार भेट गर्न उहाँ सोल्टी होटलबाट नयाँ बानेश्वर संसद् भवनमा आउनुहुनेछ । सो भेटवार्तामा सबै दलका प्रमुख सचेतक र सचेतक तथा नेपाल–चीनमैत्री संसदीय समूहको टोलीका सदस्य पनि हुनेछ ।
सोमबार नै सभामुख सापकोटाले आयोजना गर्नुहुने रात्रिभोजमा अध्यक्ष झान्सु सहभागी भई पुनः सोल्टी होटल फर्कनुहुनेछ ।
मंगलबार बिहान ९ बजे नयाँ बानेश्वरस्थित संसद् भवनमा राष्ट्रियसभाका अध्यक्ष गणेश तिमिल्सेनासँग भेटवार्ता गर्ने कार्यक्रम छ।
त्यसपछि झान्सुले नेकपा (एमाले) का अध्यक्ष केपी शर्मा ओलीसँग र त्यसपछि नेकपा (माओवादी केन्द्र)का अध्यक्ष पुष्पकमल दाहालसँग भेटवार्ता गर्नुहुनेछ ।
नयाँ बानेश्वरबाट सोल्टी होटल पुग्ने र त्यहाँ परराष्ट्रमन्त्री डा नारायण खड्कासँग भेटवार्ता गर्नुहुनेछ । दिउँसो प्रधानमन्त्री शेरबहादुर देउवासँग शिष्टाचार भेटका लागि बालुवाटार पुग्ने कार्यक्रम छ ।
बुधबार दिउँसो उहाँले राष्ट्रपति विद्यादेवी भण्डारीसँग शीतल निवासमा शिष्टाचार भेटवार्ता गर्नुहुनेछ । बिहीबार स्वदेश फर्कने कार्यक्रम छ ।
