काठमाडौं । आइसीसी टी–२० विश्वकपमा श्रीलंकाले नेदरल्यान्ड्सलाई १६ रनले पराजित गराएको छ ।
सिमोन्ड स्टेडियममा जारी खेलमा श्रीलंकाले नेदरल्यान्ड्सलाई जितका लागि १६३ रनको लक्ष्य दिएको थियो । तर नेदरल्यान्ड्सले भने निर्धारित २० ओभरमा ९ विकेट गुमाउँदै १४६ रन मात्र बनाउ सक्यो ।
नेदरल्यान्ड्सका ओपनर ब्याटर म्याक्स ओडाउडले नट आउट ७१ रन बनाए । उनले ४० बलमा ५ चौका र १ छक्का हाने । कप्तान स्कट इड्वार्डसले २१ तथा टोम कोपरले १६ रन बनाए । यस्तै बास डि लेडे १४ रनमा आउट भए । श्रीलंकाका वानिन्डु डी सिल्भाले ३ विकेट र महेश थक्सानाले २ विकेट लिए ।
टस जितेर ब्याटिङ रोजेको श्रीलंकाले निर्धारित २० ओभरमा ६ विकेट गुमाउँदै १६२ रन बनाएको थियो । श्रीलंकाका ओपनर ब्याटर कुसल मेन्डिसले ७९ रन बनाए । उनले ४४ बलमा ५ चौका र ५ छक्का प्रहार गरेका हुन् । चरिथ आशलंकाले ३ चौका सहित ३१ रन बनाए । नेदरल्यान्ड्सका लागि पल भान र लेडेले समान २ विकेट लिए ।
जितसँगैै समुह एकको अंक तालिकामा श्रीलंका शीर्ष स्थानमा उक्लिएको छ ।
