एजेन्सी । इंग्लिस क्लब चेल्सी च्याम्पियन्स लिगको नकआउट चरणमा प्रवेश गरेको छ । मंगलबार राति भएको खेलमा अष्ट्रियन क्लब एफसी साल्जबर्गलाई उसकै मैदानमा २-१ गोलले पराजित गर्दै नकआउट चरणमा स्थान बनाएको हो ।
चेल्सीको जितमा माटियो कोभाचिच र काइ हाभर्ट्जले एकएक गोल गरे । साल्जबर्गका लागि जुनिअर अडामुले एक गोल फर्काए ।
चेल्सीले खेलको २३ औं मिनेटमा कोभाचिचको गोलबाट सुरुवाती अग्रता लिएको थियो । ४८ औं मिनेटमा अडामुले गोल गर्दै खेल बराबरीमा ल्याए । तर, ६४ औं मिनेटमा हाभर्ट्जले पुलिसिचको पासलाई सदुपयोग गर्दै गोल गरे ।
समूह ई मा रहेको चेल्सीले ५ खेल खेल्दै १० अंक जोडेको छ । तेस्रो स्थानको साल्जबर्गको ६ अंक छ ।
