काठमाडौं । नेकपा एमालेका अध्यक्ष एवं पूर्वप्रधानमन्त्री केपी शर्मा ओलीलाई सुनसरीको धरान उपमहानगरपालिकाका मेयर हर्क साम्पाङले ‘हाउडे’को संज्ञा दिएका छन् ।
शुक्रवार एमालेको चुनावी सभालाई सम्बोधन गर्दै ओलीले नेकपा एमालेले धरानमा कोशीको पानी ल्याउने बताएको प्रसङ्गलाई लिएर साम्पाङले सामाजिक सञ्जालमार्फत ओलीको अभिव्यक्तिलाई कटाक्ष गरेका हुन् ।
र्हकले ओली बोलेको भाषणको स्क्रिनसट सेयर गर्दै ओलीले कोशीको पानी धरानमा ल्याउने भनेर गफ दिएको र आफूले नै कोशीको पानी ल्याउने उल्लेख गरेका छन् ।
‘ग्यासको पाइप घर घरमा पुराएर पानी जहाजमा नेपालीलाई शयर गराउनेले कोशीको पानी ल्याउने गफ दिएछ’, उनले लेखेका छन्, ‘म ल्याउँछु पानी कोशीको ! धेरै चुनौती नदिँदा हुन्छ हाउडेले ।’
अध्यक्ष ओलीले भनेका थिए ‘धरानको खानेपानी र विकास निर्माणका लागि राष्ट्रिय योजना, राष्ट्रिय बजेट चाहिन्छ, त्यसका लागि एमालेको सरकार चाहिन्छ, ‘पम्पिङ गरेर कोशीबाट पानी ल्याएर एमालेले खुवाउँछ, तपाईंहरु ढुक्क हुनुहोस्, नगरको बजेटले सम्भावना छैन, मंसिर ४ पछि आयोजना सुरु गर्ने छौं, काम सुरु गर्ने छौं, स्थायी ढङ्गले पानीको समस्या समाधान गर्छौं, छेउमै कोशी बग्छ, धरान कसरी काकाकूल हुनसक्छ ?’
