विराटनगर । नेकपा (एमाले) का अध्यक्ष केपी शर्मा ओलीले अहिलेको गठबन्धनको सरकार खरानीको डल्लो भएको बताउनुभएको छ । विराटनगर विमानस्थलमा पत्रकारहरुसँग कुरा गर्दै उहाँले भन्नुभयो, “यो गठबन्धन सरकार मंसिर ४ पछि रहँदैन, यो खरानीको डल्लो जस्तो हो ।”
मंसिर ४ को निर्वाचनपछि माओवादी खरानीको डल्लो फुट्ने र सडकमा जाने बताउनुभयो । उहाँले आगामी निर्वाचनमा माओवादी ५÷७ सिटमा सीमित हुने टिप्पणी गर्नुभयो ।
नेकपा (माओवादी केन्द्र) का अध्यक्ष पुष्पकमल दाहाल प्रचण्डले गठबन्धन २० वर्ष टिक्ने भनी दिएको अभिव्यक्तिप्रति अध्यक्ष ओलीले हिजो छोरी बिकाउनका लागि १५ वर्ष भनेको र आज आफू बिक्नका लागि २० वर्ष भनेर हल्ला मात्र चलाइएको बताउनुभयो ।
गठबन्धन २० वर्ष टिक्छ भन्ने जस्तो भावुक कुरा केही होइन भन्दै उहाँले भन्नुभयो, “यस्ता नचाहिने खालका प्रलोभन बाँडेको हो, हिजो छोरी जिताउन १५ वर्ष भने, आज आफू बिक्न २० वर्ष भन्दैछन्, अरु कसैको श्रीमती, कसैका छोरा, कसैका ज्वाइँलाई जिताउनका लागि दिइने यस्ता अभिव्यक्ति राष्ट्रिय राजनीतिको विषय बन्दैन ।”
