काठमाडौँ । कतारमा जारी फिफा विश्वकप फुटबल अन्तर्गत फ्रान्स क्वाटरफाइनलमा प्रवेश गरेको छ ।
भर्खरै सम्पन्न खेलमा पोल्याण्डलाई ३-१ गोलले पराजित गर्दै फ्रान्सले अन्तिम ८ मा स्थान पक्का गरेको हो । फ्रान्सलाई जित दिलाउन किलियन एम्बाप्पेले दुई गोल एक असिस्ट तथा ओलिभर जिराउडले एक गोल गरे । पोल्याण्डका लागि रोबर्ट लेवान्डोस्कीले एक गोल फर्काए ।
खेलको १६ औं मिनेटमा फ्रान्सका ओश्मान डेम्बेलेले प्रहार गरेको बललाई पोल्याण्डका गोलकिपर सेजनीले सजिलै नियन्त्रणमा लिए । २० औं मिनेटमा पोल्याण्डका रोबर्ट लेवान्डोस्कीले प्रहार गरेको बल फ्रान्सको पोस्ट भन्दा थोरै बाहिरिन पुग्यो ।
३८ औं मिनेटमा पोल्याण्डका जेलेन्स्कीले प्रहार गरेको बललाई फ्रान्सका गोलकिपर ह्युगो लोरिसले सजिलै निण्न्त्रणमा लिए । ४४ औं मिनेटमा जिराउडले गोल गर्दै फ्रान्सलाई सुरुवाती अग्रता दिलाए । उनलाई एम्बाप्पेले पास उपलब्ध गराएका हुन् ।
७४ औं मिनेटमा एम्बाप्पेले गोल गर्दै फ्रान्सको अग्रता दोब्बर पारे । उनलाई डेम्बेलेले पास उपलब्ध गराए । यस्तै ९० औं मिनेटमा एम्बाप्पेले व्यक्तिगत दोस्रो तथा फ्रान्सका लागि तेस्रो गोल गरे ।
खेलको इन्जुरी समयमा पोल्याण्डका लागि रोबर्ट लेवान्डोस्कीले पेनाल्टीमार्फत गोल गरे ।
