सुर्खेत । सुर्खेतमा एक पुरुषले श्रीमतीको हत्या गरी प्लास्टिकको झोलामा टाउको बोकेर हिँड्दै गरेको भेटिएको छ ।
आफ्नै श्रीमती ३० वर्षीया मिना आले मगरलाई धारिलो हतियार हँसिया प्रहार गरी हत्या गरेको अभियोगमा पञ्चपुरी नगरपालिका–३ तोक्मा बस्ने ३८ वर्षीय अम्मर बहादुर आले मगरलाई मंगलबार दिउँसो प्रहरीले पक्राउ गरेको हो ।
आलेलाई प्रहरीले उनकी श्रीमती मिना आले मगरको टाउकोसहित नियन्त्रणमा लिएको हो । आले श्रीमतीको टाउको बोकेर प्रहरी चौकीतिर हिँड्दै गरेको अवस्थामा पक्राउ परेका हुन् ।
हँसियाले घाँटी रेटेर उनको टाउको छुट्याइ झोलामा बोकेर हिँडिरहेको भन्ने खबर प्राप्त भएपछि प्रहरी चौकी सालकोटबाट खटिएको टोलीले उनलाई नियन्त्रणमा लिएको हो ।
आलेमगर आफैं टाउको बोकेर प्रहरी चौकीतिर जाँदै गरेको बुझिएको छ । एक वर्षअघि वैदेशिक रोजगारीबाट फर्किएका आलेले विदेशमा कमाएको पैसा हिनामिना गरेका कारण श्रीमतीको हत्या गरेको बयानमा बताएका छन् ।
