काठमाडौं । जनता समाजवादी पार्टी (जसपा)नेपालको महन्थ ठाकुर पक्ष र उपेन्द्र यादव पक्षको कार्यकारिणी समितिको छुट्टाछुट्टै बैठक बस्दैछ ।
ठाकुर पक्षको बबरमहलमा र यादव पक्षको बालकुमारीमा बैठक जारी छ । पार्टीभित्रको विवादका विषयमा निर्वाचन आयोगले छलफलका लागि दुवै पक्षलाई मंगलवार उपस्थित हुन भनेपछि उनीहरु छलफलमा जुटेका हुन् ।
ठाकुर पक्षको बैठकमा हेरफेर गरि नयाँ कायम गरिएको कार्यकारिणी समितिका सदस्य समेत सहभागी रहेका छन् भने यादव पक्षको बैठकमा पुरानै कार्यकारिणी समितिका सदस्यहरु सहभागी रहेको बताइएको छ । अध्यक्ष ठाकुरले कार्यकारिणी समितिबाट यादव पक्षका २० जनालाई हटाएर आफूपक्षीय २० जना थप गरेका थिए ।
यद्यपि सो कार्यकारिणी समितिले निर्वाचन आयोगबाट मान्यता पाएको छैन । विवाद बढ्दै जाँदा पार्टीको अधिकारिताका लागि जसपाका अध्यक्ष उपेन्द्र यादवले आयोगमा निवेदन दिएपछि छलफलका लागि दुवै पक्षलाई बोलाइएको हो । आधिकारिकताका लागि अध्यक्ष यादवले निवेदन दिएपछि आयोगले ठाकुर पक्षलाई पनि आफ्नो पक्षबाट प्रमाण बुझाउन पत्र पठाएको थियो । सो पत्र अनुसार अध्यक्ष ठाकुरले निर्वाचन आयोगलाई पत्र पठाएका थिए ।
आयोगले सहमतिका लागि दुवै पक्षलाई बोलाएपनि दुवै पक्ष सहमतिका लागि तयार देखिँदैनन् ।
