काठमाडौँ । राष्ट्रपति–उपराष्ट्रपति निर्वाचनको मनोनयन नजिकिँदै जाँदा नेताहरूको दौडधुप पनि बढेको छ । नेकपा (एकीकृत समाजवादी)का अध्यक्ष माधव नेपाल कांग्रेस सभापति शेरबहादुर देउवा निवासमा पुगेका छन् । राष्ट्रपति निर्वाचनबारे छलफल गर्नका लागि अध्यक्ष नेपाल धुम्बाराही पुगेका हुन् ।
धुम्बाराहीमा नेपाली कांग्रेस, नेकपा एस र जसपाका नेता छलफलमा छन् । एकीकृत समाजवादीका केही नेता कांग्रेस सभापति देउवाको निवास धुम्वाराही पुगेका हुन् ।
सचिवालय बैठकलगत्तै महासचिव वेदुराम भुसाल, घनश्याम भुसाल, प्रवेश हमाल त्यहाँ पुगेको बताइएको छ । स्रोतका अनुसार त्यहाँ केहीबेर छलफलमा सहभागी भएर जसपा अध्यक्ष उपेन्द्र यादव बाहिरिएका छन् ।
सभापति देउवासँगै वरिष्ठ नेता रामचन्द्र पौडेल, महामन्त्री गगन थापालगायतका नेता भेटवार्तामा सहभागी रहेको स्रोतले बताएको छ । राष्ट्रपति निर्वाचनमा केन्द्रित रहेर नेताहरुबीच भेटघाट भएको हो ।
