काठमाडौँ । प्रधानमन्त्री पुष्पकमल दाहाल प्रचण्ड नेतृत्व सरकारमा एमालेबाट प्रतिनिधित्व गर्नुभएका उपप्रधान एवं अर्थमन्त्री विष्णु पौडेलले एमाले मन्त्रीप्रति प्रधानमन्त्रीको व्यवहारका कारण सरकार छाड्नुपरेको बताउनु भएको छ ।
‘राष्ट्रपतिमा सहमति नभए पनि सरकारमा रहेर काम गर्ने सोँचमा थियौँ, तर पछिल्ला दिनमा प्रधानमन्त्रीज्यूले एमाले र मन्त्रीहरुलाई जुन अभिव्यक्ति र व्यवहार गर्नुभयो, त्यसपछि सरकारमा बस्न सकेनौँ’ एमाले उपाध्यक्षसमेत रहनु भएका पौडेलले भन्नुभयो ।
उहाँले अगाडि भन्नुभयो ‘परराष्ट्रमन्त्री विमला राईलाई अकारण निर्देशन गर्नुभयो र हामीलाई सरकार छाड्ने या वा विनाविभागिय मन्त्री बनाउने अभिव्यक्ति गर्दै एमाले र एमालेको सहभागिताप्रति सार्वजनिक रुपमा टिप्पणी गर्न थालेपछि सरकारमा रहिरहन उचित हुने देखेनौँ ।’ पुस ११ गते सरकारमा सहभागी भएको एमालेले २ महिना पछि सरकार छाडेको हो ।
जेनेभा जान लाग्नुभएकी मन्त्री राईलाई हिजो आइतबार प्रधानमन्त्री दाहालले रोक्नुभएको थियो । राईको ठाउँमा पूर्वकानूनमन्त्री गोविन्द बन्दीसहित तीन जनालाई जेनेभा पठाइएको छ ।
