काठमाडौं । आईसीसी यू–१९ पुरुष विश्वकपको एसिया छनोट प्रतियोगितामा नेपालले आफ्नो अपराजित यात्रा कायमै राखेको छ ।
यूएईमा भएको खेलमा हङकङलाई नेपालले ९ विकेटले पराजित गरदै लगातार तेस्रो जित हात पारेको हो ।
यूएईस्थिति मलेका क्रिकेट मैदानमा भएको खेलमा हङकङले दिएको १ सय २१ रनको लक्ष्य नेपालले २२ ओभरमा १ विकेट गुमाएर पूरा गर्यो । नेपालको जीतमा आकाश त्रिपाठीले ७१ बलमा ५ चौका र ३ छक्काको सहयोगमा अविजित ५८ रनको अर्धसतकिय इनिङ खेले।
यस्तै, उत्तम थापाले ५० बलमा ४ चौकाको सहयोगमा अविजित ३९ रन बनाए । अर्जुन कुमाल भने १६ रनमा आउट भए ।
पहिले ब्याटिङ गरेको हङकङले ४६ ओभर ३ बलमा अलआउट हुदै १ सय २० रन बनाएको थियो । हङकङका लागि पर्थ भागवात ३६ रन बनाए भने मोहम्मद जाहिरले २९ रन बनाए । यसैगरी अहान त्रिवेदीले ११ रन बनाउँदा अन्य ब्याटरले दोहोरो अंकमा रन बनाउन सकेनन् ।
बलिङतर्फ नेपालका हेमन्त धामीले ३ विकेट लिए । आकाश चन्द र सुवास भण्डारीले समान २र२ विकेट लिए भने दीपेश कंडेलले १ विकेट लिए ।
प्रतियोगितामा नेपालसहित सिंगापुर,कुबेत,हङकङ,मलेसिया र आयोजक यूएईको सहभागीता रहेको छ । राउण्ड रोबिनका आधारमा हुने प्रतियोगिताको शीर्ष टोली २०२४ मा श्रीलंकामा हुने यू–१९ विश्वकपका लागि छनोट हुनेछ।
