काठमाडौँ । काठमाडौं महानगरपालिकाका प्रमुख बालेन्द्र (बालेन) साहले नेकपा (एमाले) नेता महेश बस्नेतसँग भेटवार्ता गर्नुभएको छ । बालेनले नेता बस्नेतको घर भक्तपुर नेता बस्नेतसँग भेटवार्ता गर्नुभएको हो ।
भेटमा महानगर प्रमुख बालेनले विगतको असमझदारीलाई टुंग्याएर सहकार्य गरेर अगाडि बढ्न प्रस्ताव गरेको नेता बस्नेतले बताउनुभयो । “उहाँ मेरो घर भक्तपुरको गुण्डुमा आउनुभएको थियो। विगतको असमझदारी हटाएर सहकार्य गरेर जाऔँ भन्नुभयो”, उहाँले भन्नुभयो ।
नेता बस्नेतका अनुसार भक्तपुर पुगेर विकासे योजनाको अवलोकनपछि आफ्नै घरमा संगै खाना खाएर बालेन हिँड्नुभएको थियो ।
नेता बस्नेतले बालेनको प्रस्तावपछि आफूले सकारात्मक काममा सहयोग र सहकार्य गर्न तयार रहेको जवाफ दिएको बताउनुभयो । यसअघि नेता बस्नेत बालेनको चर्को आलोचकको रुपमा प्रस्तुत हुँदै आउनुभएको थियो ।
