एजेन्सी । बलिउडका चर्चित अभिनेता तथा निर्देशक सतीश कौशिकको निधन भएको छ । उनको ६६ वर्षको उमेरमा निधन भएको हो । अभिनेता अनुपम खेरले आज बिहान ट्वीट गर्दै यो जानकारी दिएका हुन् ।
अनुपमले लेखेका छन् , ‘सतीश, तिमी बिनाको जीवन उस्तै हुनेछैन ।’ यद्यपि, उनको मृत्युको कारण भने खुल्न सकेको छैन ।
सतीशको जन्म १३ अप्रिल १९६५ मा हरियाणामा भएको थियो । उनको दिल्लीमा पढाइ भयो । किरोरी माल कलेजबाट स्नातक गरेपछि उनले नेशनल स्कूल अफ ड्रामा (एनएसडी) मा भर्ना भए । सन् १९८५ मा उनले शशि कौशिकसँग विवाह गरे ।
सतीशले सन् १९८३ मा बलिउडमा डेब्यू गरेका थिए । यसअघि उनले थिएटरमा काम गरेका थिए । उनी एक अभिनेता, हास्य कलाकार, पटकथा लेखक, निर्देशक र निर्माता थिए । सतीशलाई सन् १९८७ मा फिल्म ‘मिस्टर इन्डिया’बाट पहिचान मिलेको थियो । त्यसपछि उनले सन् १९९७ मा ‘दिवाना–मस्ताना’मा पप्पु पेजरको भूमिका निभाएका थिए । सतीशले १९९० मा ‘राम लखन’ र १९९७ मा ‘साजन चले ससुराल’का लागि सर्वश्रेष्ठ हास्य कलाकारको लागि फिल्मफेयर पुरस्कार प्राप्त गरे ।
