विराटनगर । प्रदेश १ को विपक्षी दल (माओवादी केन्द्र)ले प्रदेशसभा बैठक अवरुद्ध गरेको छ ।
आर्थिक वर्ष २०७८/७९ को बजेटको भौतिक पूर्वाधार क्षेत्रको विषयगत छलफलमा उठेका प्रश्नहरुको जवाफ दिने क्रममा आइतबार भौतिक पूर्वाधार विकासमन्त्री अम्बिरबाबु गुरुङले सदनमा दिएको अभिव्यक्तिप्रति असहमति जनाउँदै माओवादी केन्द्रले सोमबार बैठक अवरुद्ध गरेको हो ।
जब सभामुख प्रदिपकुमार भण्डारीले सदन सुरु गर्न लागे तब माओवादी केन्द्रका प्रदेशसभा सदस्यहरुले आ–आफ्ना सिटबाट उठेर सदन अवरुद्ध गरेका थिए ।
सदन अवरुद्ध गरेपछि सभामुख भण्डारीले माओवादी केन्द्रका एक जना प्रदेशसभा सदस्यलाई आफ्ना कुरा राख्न समय दिएका थिए ।
सभामुख भण्डारीले पटकपटक बस्न आग्रह गर्दा पनि नबसेपछि मंगलबार साढे १२ बजेसम्मका लागि बैठक स्थगित भएको छ ।
