काठमाडौँ । काठमाडौँस्थित पाकिस्तानी राजदूतावासले ‘नेपाल–पाकिस्तान मैत्री टि–२० क्रिकेट प्रतियोगिता–२०२३ को आठौँ संस्करण’ को आयोजना गरेको छ ।
प्रतियोगिता फागुन २६ देखि सुरु भएको थियो । प्रतियोगितामा १२ टोलीले भाग लिएका थिए।
यस वर्ष पल्सर क्रिकेट एक्सेलेन्स सेन्टर, काठमाडौँले आठौँ संस्करणको नेपाल–पाकिस्तान टी–२० क्रिकेट प्रतियोगिता–२०२३ को उपाधि जितेको छ भने दूतावासको पाकिस्तान टोली प्रतियोगिताको उपविजेता बनेको छ ।
पुरस्कार वितरण समारोहमा पूर्वपरराष्ट्रमन्त्री रमेशनाथ पाण्डेले नेपाल–पाकिस्तान मैत्री टी–२० क्रिकेट प्रतियोगिताको विजेता टोलीलाई ‘हिमालय शमशेर राणा ट्रफी’ प्रदान गर्नुभयो ।
पाकिस्तानी राजदूतावासका अनुसार काठमाडौँका लागि जनवादी गणतन्त्र चीनका राजदूत चेन सोङले पनि विशेष अतिथिको रुपमा कार्यक्रममा सहभागिता जनाउनुभएको थियो ।
त्यस्तै समापन समारोहमा परराष्ट्र मन्त्रालयका सहसचिव रामप्रसाद सुवेदी र काठमाडौँस्थित कूटनीतिक नियोगका केही सदस्यहरूको पनि उपस्थिति थियो ।
समारोहमा श्रीलंकाका कार्यवाहक राजदूत, कतार र बंगलादेशका डेपुटी चिफ अफ मिसनको पनि सहभागिता थियो । उहाँहरुले टी–२० क्रिकेट प्रतियोगिताका प्रख्यात खेलाडी तथा पदाधिकारीहरुलाई पनि पुरस्कार प्रदान गर्नुभएको थियो ।
समारोहमा पूर्व परराष्ट्रमन्त्री पाण्डेले कार्यक्रमलाई सफलतापूर्वक आयोजना गरेकोमा पाकिस्तानी दूतावासको पहलको प्रशंसा गर्नुभयो। उहाँले यस्ता स्वस्थ कार्यक्रम आयोजनाले नेपालमा खेलकुद गतिविधिलाई मात्रै नभई दुई देशबीचको द्विपक्षीय सम्बन्धलाई पनि मजबुत बनाउने बताउनुभयो ।
पाकिस्तानी राजदूत उमैर अलीले यस प्रतियोगिताले नेपाल र पाकिस्तानबीच पारस्परिक हितका सबै क्षेत्रमा थप सहयोग र सहकार्यक लागि यसले एउटा एक पाइला अगाडि बढ्ने विश्वास व्यक्त गर्नुभयो ।
उहाँले त्यस्ता स्वस्थ खेलकुद कार्यक्रमहरू आयोजना गरी दुई देशका युवाहरूलाई एकसाथ ल्याउने प्रयासलाई निरन्तरता दिने पाकिस्तानी दूतावासको प्रतिबद्धता दोहोर्याउनुभयो ।
