काठमाडौँ । चीनमा उपचाररत नेकपा (माओवादी केन्द्र)का उपमहासचिव वर्षमान पुनले प्रधानमन्त्री पुष्पकमल दाहाल प्रचण्ड र नेपाली कांग्रेस सभापति शेरबहादुर देउवासँग टेलिफोन संवाद गरेका छन् ।
पुनले प्रचण्डसँग सोमबार र देउवासँग मंगलबार संवाद गरेका हुन् । नेता पुनले संसदका झन्डै दुई तिहाइ सदस्यले विश्वासको मत दिएकामा प्रधानमन्त्रीलाई बधाई दिएको उनको सचिवालयले जनाएको छ ।
दुवै नेतासँग उनले राजनीतिक स्थायित्व, संविधानको रक्षा तथा जनआकांक्षाअनुसार सुशासन, विकास र रोजगारी सृजना गर्ने गरी सरकार र सत्ता गठबन्धन अघि बढ्नुपर्ने धारणा राखेका थिए ।
देउवासँग पुनले प्रतिनिधि र प्रदेशसभा निर्वाचनमा एउटै एजेन्डा लिएर जनतामा गएका दलहरू एकै ठाउँ बस्ने वातावरण बन्नुले जनमतको सम्मान भएको भन्दै खुसी व्यक्त गरेका छन् ।
प्रचण्ड र देउवा दुवैले पुनको स्वास्थ्य लाभको कामना गर्दै छिट्टै निको भएर फर्कने विश्वास लिएका छन् । पुन जटिल प्रकारको वंशाणुगत जन्डिसबाट पीडित पुन बेथा बल्झिएपछि उपचारका लागि गत १ फागुनमा चीन गएका थिए । पुनसँगै पूर्वसभामुखसमेत रहेकी पत्नी ओनसरी घर्ती पनि साथमा छिन् ।
