काठमाडौं । नेपाल क्रिकेट संघ (क्यान) ले नेपाली क्रिकेट टिमको प्रशिक्षक मोन्टी देसाइको मासिक तलब २० प्रतिशत वृद्धि गरेको छ ।
क्यानको प्रशिक्षक देसाइसँग भएको सम्झौता अनुरुप उनको तलब बढ्न लागेको हो । क्यानले यसअघि नै नेपालले एक दिवसीय मान्यता जोगाउन सफल भएको खण्डमा तलब बढाउने सम्झौता गरेको थियो । यसअघि देसाइले मासिक १० हजार डलर पाउने सम्झौता रहेकोमा अब उनले मासिक १२ हजार डलर(झन्डै १६ लाख नेपाली रुपैयाँ) पाउने छन् ।
क्यानका अध्यक्ष चतुर बहादुर चन्दले नेपालले ओडिआई मान्यतालाई निरन्तरता दिएपछि सम्झौता अनुसार तलब बढाउने कुरा भएको बताएका छन् । ‘शीर्ष तीनमा पुग्छौं भन्नेमा मैले कल्पना गरेको थिएन । ओडिआई मान्यता ७५ प्रतिशत जितेर लिन सक्छौं भन्ने थियो । ओडिआई बचाए मोन्टीको तलब बढाउने सम्झौता थियो । १०/१२ दिनको अभ्यासपछि मोन्टीले ओडिआई बचाउन सक्छु भन्ने आश्वासन दिएका थिए’, चन्दले भने,‘उहाँको प्रशिक्षणमा नेपालले एक दिवसीय मान्यता जोगाउनुका साथै विश्वकप क्वालिफायर्समा पनि स्थान सुरक्षित गरेको छ । त्यसैले पूर्वशर्त अनुसार हामीले तलब वृद्धि गरेका छौँ’।
गत माघ २३ गते क्रिकेट संघले देसाइलाई प्रमुख प्रशिक्षकमा नियुक्ति गरेको थियो । मोन्टी नेपालको मुख्य प्रशिक्षक हुनुअघि लिग २ मा २४ खेलमा ८ जित र १४ मा हारसहित १८ अंकका साथ नेपाल तालिकाको छैटौं स्थानमा थियो । मोन्टीको प्रशिक्षणमा नै नेपालले पछिल्ला १२ मध्ये ११ खेल जितेको थियो । यससँगै, ३६ खेलमा १९ जित र १५ हारसहित ४० अंकका साथ तेस्रो स्थानमा रहि सिधै विश्वकप छनौटमा स्थान बनाउन सफल रह्यो।
