काठमाडौँ । प्रधानमन्त्री पुष्पकमल दाहाल प्रचण्डले शुक्रबार दिउँसो मन्त्रिमण्डल पुनर्गठन गर्दै हुनुहुन्छ ।
नयाँ मन्त्रिपरिषद्मा दुई जना उपप्रधानमन्त्री बन्नुहुनेछ । नेपाली कांग्रेसका उपसभापति पूर्णबहादुर खड्का उपप्रधानमन्त्री एवं रक्षामन्त्री नेकपा (माओवादी केन्द्र) बाट वरिष्ठ उपाध्यक्ष नारायणकाजी श्रेष्ठ उपप्रधानमन्त्री एवं गृहमन्त्री बन्दै हुनुहुन्छ ।
त्यस्तै नेपाली कांग्रेसबाट डा प्रकाशशरण महत अर्थमन्त्री, रमेश रिजाल उद्योग, वाणिज्य तथा आपूर्तिमन्त्री, सीता गुरुङ शहरी विकासमन्त्री हुनुहुनेछ । कांग्रेसको भागमा ८ वटा मन्त्रालय परे पनि पार्टीभित्रको आन्तरिक विवादका कारण पार्टी सभापति शेरबहादुर देउवाले अहिले चार जनाको मन्त्रीको नाम मात्र पठाउनुभएको छ ।
नेकपा (माओवादी केन्द्र) बाट ऊर्जा, जलस्रोत तगा सिँचाइ मन्त्रालयको कार्यभार शक्ति बस्नेतले सम्हाल्नुहुनेछ । त्यस्तै यसअघि नै मन्त्री भइसक्नुभएका रेखा शर्मालाई पुरानै सञ्चार तथा सूचना प्रविधि मन्त्रालय, सुदन किरातीलाई संस्कृति, पर्यटन तथा नागरिक उड्डयन मन्त्रालय र अमनलाल मोदीलाई संघीय मामिला तथा सामान्य प्रशासन मन्त्रालयको कार्यभार सुम्पिएको छ ।
नेकपा (एकीकृत समाजवादी) बाट उपाध्यक्ष डा बेदुराम भुसाल कृषि तथा पशुपक्षी विकासमन्त्री र प्रकाश ज्वाला भौतिक पूर्वाधार तथा यायायातमन्त्री बन्नुहुनेछ ।
जनता समाजवादी पार्टी (जसपा) बाट अशोक राईले शिक्षा, विज्ञान तथा प्रविधि मन्त्रालयको जिम्मेबारी पाउनु हुनेछ भने लोकतान्त्रिक समाजवादी पार्टी (लोसपा) बाट शरतसिंह भण्डारी श्रम तथा रोजगारमन्त्री बन्नुहुनेछ ।
त्यस्तै नागरिक उन्मुक्ति पार्टी (नाउपा) का अध्यक्ष रञ्जिता श्रेष्ठ भूमि व्यवस्था, सहकारी तथा गरिबी निवारणमन्त्री र नेपाल समाजवादी पार्टीका अध्यक्ष महिन्द्रराय यादव महिला, बालबालिका तथा ज्येष्ठ नागरिक मन्त्री बन्नुहुनेछ ।
