एजेन्सी । लन्डन क्लब चेल्सीले मुख्य प्रशिक्षक ग्राहम पोटरलाई बर्खास्त गरेको छ । शनिबार घरेलु मैदानमा एस्टन भिल्लासँग २–० ले पराजित भएपछि चेल्सीले प्रशिक्षक पोटरलाई बर्खास्त गरेको हो ।
पोटरको प्रशिक्षणमा भएको ३२औं खेलमा चेल्सीको यो १२औं हार हो । यो सिजनमा ५५० मिलियन पाउन्डभन्दा बढी रकम खर्चेर खेलाडी अनुबन्ध गरेको चेल्सी प्रिमियर लिगमा ११औं स्थानमा झरेको छ । चेल्सी शीर्ष चारभन्दा १२ अंकले पछि छ ।
चेल्सीका मालिक टोड बोहलीले प्रशिक्षक र व्यक्तिको रूपमा ग्राहमको लागि उच्च सम्मान रहेको बताएका छन् । ‘हाम्रा अविश्वसनीय फ्यानहरूसँगै हामी सबै सिजनको बाँकी खेलमा ध्यान केन्द्रित गर्नेछौं ।’ बोहलीले भने, ‘हामीसँग प्रिमियर लिगका १० खेलहरू बाँकी छन् र च्याम्पियन्स लिगको क्वाटरफाइनल पनि छ । हामी ती प्रत्येक खेलमा सबै प्रयास र प्रतिबद्धता राख्नेछौं र सिजन समाप्त गर्नेछौं ।
अब ब्रुनो साल्टरले अन्तरिम मुख्य प्रशिक्षकको रूपमा टोलीको जिम्मेवारी लिनेछन् । चेल्सीले प्रिमियर लिगमा मंगलबार लिभरपुलसँग र १२ अप्रिलमा च्याम्पियन्स लिगको क्वार्टरफाइनलको पहिलो लेगमा रियल म्याड्रिडको सामना गर्दैछ ।
