एजेन्सी । साविक विजेता गुजरातले इन्डियन प्रिमियर लिग (आईपीएल)मा दिल्ली क्यापिटल्समाथि लगातार दोस्रो जित दर्ता गरेको छ । १६ औं सिजनको सातौं खेलमा गुजरातले दिल्लीलाई ६ विकेटले पराजित गरेको हो ।
यो सिजन गुजराजको लगातार दोस्रो जित हो । टोलीले लक्ष्य पछ्याएको ११ खेलमध्ये १० जितेको छ । दिल्लीले आफ्नो घरेलु मैदान अरुण जेटली मैदानमा निर्धारित २० ओभरमा ७ विकेट गुमाएर १६२ रन बनाएको थियो । गुजरातका ब्याट्सम्यानले १८.१ ओभरमा ४ विकेट गुमाएर १६३ रनको लक्ष्य पुरा गरे ।
साविक विजेता गुजरातले टस जितेर आयोजकलाई ब्याटिङको निम्तो दिए पनि घरेलु मैदानमा दिल्लीले राम्रो सुरुवात गर्न सकेन । २९ रनको टिम स्कोरमा ओपनर पृथ्वी शा ७ रन बनाएर पेभिलियन फर्किए । उनलाई मोहम्मद शामीले आउट गरेका थिए । त्यसपछि शमीले मिचेल मार्सलाई दोहोरो अंक पार गर्न दिएनन् । अल्जारी जोसेफले कप्तान वार्नर (३७ रन) लाई बोल्ड गरेपछि दिल्ली समस्यामा पर्यो ।
यस्तो अवस्थामा सर्फराज खान (३० रन)ले विकेटकिपर अभिषेक पोरेल (२० रन)सँग दबाबपूर्ण इनिङ्स खेले । अन्तिम ओभरमा अक्षर पटेल (३६ रन)ले तीन छक्का प्रहार गर्दै टोलीको स्कोर १५० रनमा पुर्याए ।
गुजरातका लागि मोहम्मद सामी र राशिद खानले ३–३ तथा अल्जारी जोसेफले २ विकेट लिए ।
जवाफमा गुजरातका ओपनरहरूले मात्र २२ रन जोडेका थिए जब सिजनको आफ्नो पहिलो खेल खेल्दै आएका एनरिक नोर्त्याले आफ्नो पहिलो बलमा ऋद्धिमान शाहालाई बोल्ड गरे । उनले आफ्नो स्पेलको दोस्रो ओभरको पहिलो बलमा शुभमन गिललाई बोल्ड गरेर गुजरातलाई समस्यामा पारे ।
कप्तान हार्दिक पाण्ड्याले पनि खासै रन जोड्न सकेनन् । पावर प्लेमा टोलीले ५४ रनमा तीन विकेट गुमाएको थियो । यस्तो अवस्थामा तेस्रो नम्बरमा रहेका साई सुदर्शनले विजय शंकर र डेभिड मिलरसँग अर्धशतकीय साझेदारी गर्दै टोलीलाई जित दिलाए । दिल्लीका एनरिच नोर्त्याले दुई, खालिद अहमद र मिचेल मार्सले एक–एक विकेट लिए ।
