काठमाडौँ । नेकपा (एमाले) केन्द्रीय कमिटीको बैठक जारी रहेको छ । पार्टीको केन्द्रीय कार्यालय च्यासलमा सुरु भएको बैठक तीन दिनसम्म चल्नेछ ।
एमालेका प्रचार विभाग उपप्रमुख विष्णु रिजालका अनुसार बैठकमा १० वटा एजेन्डामा छलफल हुनेछ। वैशाख २६ मा बसेको सचिवालय बैठकले केन्द्रीय समितिको बैठकको लागि १० वटा एजेन्डा तय गरेको थियो।
बैठकमा अध्यक्ष केपी शर्मा ओलीले राजनीतिक प्रतिवेदन पेश गर्नुका साथै, निर्वाचनको समीक्षा, ग्रास रुट अभियानको समीक्षा, भावी नीति तथा कार्यक्रमलगायतका एजेन्डा तय भएका छन्।
त्यसैगरी बैठकमा पार्टीका निलम्बित सचिव टोपबहादुर रायमाझी नक्कली भुटानी शरणार्थी प्रकरणमा मुछिएको विषयमा पनि छलफल हुने बताइन्छ। सो प्रकरणमा शीर्ष नेताहरू नै मुछिएका छन्। सांसद समेत रहेका रायमाझीलाई बुधवार सचिव पदबाट भने निलम्बन गरेको थियो ।
