एजेन्सी । राजस्थान रोयल्स (आरआर)का ब्याट्सम्यान जोस बटलरलाई खेल शुल्कको १० प्रतिशत जरिवाना गरिएको छ । बटलरले आईपीएल आचार संहिताको धारा २(२) अन्तर्गत लेभल १ नियम उल्लङ्घन गरेकाले जरिवाना लगाइएको हो ।
इन्डियन प्रिमियर लिग (आईपीएल)को ५६ औं खेलमा आरआरले कोलकाता नाइट राइडर्स (केकेआर)लाई ९ विकेटले पराजित गरेको थियो । इडेन गार्डेन स्टेडियममा टस हारेर पहिले ब्याटिङ रोजेको केकेआरले २० ओभरमा ८ विकेट गुमाएर १४९ रन बनाएको थियो । जवाफमा आरआरले १३.१ ओभरमा लक्ष्य पूरा गर्यो ।
१५० रनको लक्ष्य पछ्याएको राजस्थानका यशस्वी जैसवालले पहिलो ओभरमै २६ रन बनाएका थिए । उनले १३ बलमा अर्धशतक पूरा गर्दै ९८ रनको नटआउट इनिङ खेलेर ४१ बल बाँकी रहँदै टोलीलाई जित दिलाएका थिए ।
खेलमा केकेआरले दिएको लक्ष्य पछ्याउन आरआरको टोली मैदानमा उत्रिएपछि यशस्वी जैसवालको गलत कलका कारण बटलर अलमलमा परे र आन्द्रे रसेलको सिधा थ्रोमा रनआउट भए ।
आउट भएपछि बटलर मैदानबाट बाहिर निस्कँदै गर्दा उनले आक्रोशित हुँदै आफ्नो ब्याटले बाउन्ड्रीको डोरीमा प्रहार गरेका थिए । जसका कारण उनलाई आईपीएलले जरिवाना गरेको हो ।
बटलरलाई आईपीएलको गभर्निङ काउन्सिलले नियम उल्लंघन गरेको आरोपमा दोषी ठहर गरेको छ । एक आधिकारिक विज्ञप्तिमा भनिएको छ कि जोस बटलरले आईपीएल आचार संहिताको धारा २(२) अन्तर्गत नियम उल्लङ्घन गरेका छन् । यस नियममा उपकरण वा कपडा, मैदान उपकरणको दुरुपयोग हुँदा खेलाडी दोषी पाइन्छ । बटलरले यो सिजन १२ खेलमा ३९२ रन बनाएका छन् ।
