एजेन्सी । केहीमहिना पहिले बलिउडका जोडी सिद्धार्थ मल्होत्रा र कियारा आडवाणी विवाह बन्धनमा बाँधिए । उनीहरुले विवाहमा करोडौं खर्च गरे । यी दुई जोडीभन्दा पहिले कैयौं बलिउड स्टारले आफ्नो बिहेमा करोडौं खर्च गरे तर यस्ता थुप्रै जोडीहरु पनि रहेका छन् जसको वैवाहिक जीवन धेरै समय टिक्न सकेन । ती जोडीहरुबारे चर्चा गरौं–
करिश्मा कपुर – सञ्जय कपुर
बलिउडमा एक समयकी सबैभन्दा चर्चित अभिनेत्री करिश्मा कपुरले २००३ सेप्टेम्बर २९ मा व्यापारी सञ्जय कपुरसँग बिहे गरेकी थिइन् । उक्त बिहे शिख रीतिरिवाजले भएको थियो जसका लागि उनको पैत्रिक घर कृष्णा राज बंगला चुनिएको थियो । बिहे एकदमै धुमधाम तरिकाले भएको थियो । यी जोडीको एक छोरी समायरा र छोरा कियान छन् । बिहेको ११ वर्षपछि यो जोडीले सम्बन्धविच्छेद गरे । सन् २०१६ मा अदालतले दुईको सम्बन्धविच्छेदलाई स्वीकृत गर्यो ।
सामन्था अक्किनेनी – नागा चैतन्य
साउथ अभिनेत्री सामन्था अक्किनेनी र नागा चैतन्य पछिल्लो केही समयअघि देखि सम्बन्धविच्छेदका कारण चर्चामा रहेका छन् । यो जोडीले २०१७ मा गोवामा बिहे गरेका थिए जसमा साउथका ठूला हस्तिहरु उपस्थित थिए । यो जोडीले हिन्दु र क्रिश्चियन परम्पराले बिहे गरेका थिए । बिहेमा १० करोडभन्दा बढी खर्च भएको थियो । यो साउथको सेलिब्रेटीको सबैभन्दा महँगो विवाहमध्ये एक हो ।
मनिषा कोइराला – सम्राट दाहाल
एक जमानाको सबैभन्दा मन पराइएकी अभिनेत्री मनिषा कोइरालाले २०१० जुन १९ मा नेपालका चर्चित व्यापारी सम्राट दाहालसँग बिहे गरेकी थिइन् । उनीहरुको बिहे धुमधामले भएको थियो । बिहेपछि यो जोडी हनिमुनका लागि फिनल्याण्ड समेत गएका थिए । तर, दुई बर्षपछि यो जोडीले अलग रहने घोषणा गरे ।
इमरान खान – अवन्तिका
बलिउड अभिनेता इमरान खानले २०११ जनवरी १० मा आफ्नो लामो समयको प्रेमिका अभन्तिकासँग बिहे गरेका थिए । जोेडीले आमिर खानको पाली हिलस्थित घरमा बिहे गरेका थिए जसमा थुप्रै स्टारहरु उपस्थित थिए । बिहेमा ५।५ करोड खर्च गरिएको थियो । तर, २०१९ मा यी दुईको सम्बन्धमा खटपट आयो । अभन्तिकाले आफ्नी छोरीलाई लिएर अलग बसेकी छन् । आधिकारीक रुपमा यो जोडीले सम्बन्धविच्छेद नगरेपनि दुबै अलग भइसकेका छन् ।
