एजेन्सी । स्पेनिस फुटबल ला लिगा अन्तर्गत बार्सिलोनाले हार ब्यहोरेको छ । गएराति भएको खेलमा बार्सिलोना भालाडोलिडसँग ३–१ गोलले पराजित भएको हो । खेलको दोस्रो मिनेटमा नै बार्सिलोनाका एन्ड्रीयाज क्रिस्टेन्सेनले आत्मघाती गोल गरेपछि घरेलु टोली भालाडोलिडले सुरुवाती अग्रता बनाएको थियो ।
भालाडोलिडका डार्विन माचिसले क्रस गरेको बललाई क्रिस्टेन्सेनले हेडरबाट क्लियर गर्न खोज्दा उल्टो आत्मघाती गोल हुन पुग्यो ।
२२ औं मिनेटमा काइल लारिनले पेनाल्टीमा गोल गर्दै भालाडोलिडको अग्रता दोब्बर पारे । बार्सिलोनाका एरिक गार्सियाले पेनाल्टी बक्सभित्र गोन्जालो प्लाटामाथि फउल गरेपछि भालाडोलिडले पेनाल्टीको अवसर पाएको थियो । जसलाई लारिनले खेर जान दिएनन् ।
७३ औं मिनेटमा प्लाटाले गोल गर्दै भालाडोलिडलाई ३–० ले अघि बढाए । यता, ८४ औं मिनेटमा रोबर्ट लेवान्डोस्कीले बार्सिलोनाका लागि सान्त्वना गोल गरे । बार्सिलोनाले यस सिजनको ला लिगा उपाधि जितिसकेको छ । यसअघिको खेलमा बार्सिलोना रियल सोसिडाडसँग २–१ गोलले पराजित भएको थियो ।
शीर्षस्थानको बार्सिलोनाको ३६ खेलबाट ८५ अंक छ । भालाडोलिड ३६ खेलबाट ३८ अंकसहित १७ औं स्थानमा छ ।
