विराटनगर । प्रदेश १ को नाम कोशी राखिएकोमा विरोध गर्दै आएका आन्दोलनरत पहिचानवादीहरुले विराटनगरको देवकोटा चोकमा गरेको प्रदर्शनमा प्रहरीसँग झडप भएपछि स्थिति तनावग्रस्त भएको छ ।
प्रदेशसभा छेउको निषेधित क्षेत्रमा प्रदर्शन गरेको भन्दै प्रहरीले रोक्न खोजेपछि प्रदर्शनकारीले प्रहरीमाथि ढुंगा प्रहार गरेका थिए। सो क्रममा प्रहरीले भिड तितरवितर पार्न अश्रुग्याँस र पानीको फोहोरा प्रयोग गरेको छ ।
कोशी प्रदेशको नाम संशोधनको माग गर्दै प्रदेश १ पुन: नामाङ्कन संघर्ष समिति आन्दोलनमा छ । आइतबारबाट प्रदेशसभा भवन घेर्न भन्दै भेला भएका प्रदर्शनकारीले एकै रङको पोशाक र हेलमेट प्रयोग गरेका थिए ।
प्रदेशसभाको बजेट अधिवेशन आइतबार दिउँसो २ बजे बोलाइएको छ । प्रदेशसभालाई विथोल्न आन्दोलन घोषणा गरेपछि प्रहरीले प्रदेशसभा र त्यस वरपरको सुरक्षा व्यवस्था कडा पारेको छ । गत फागुन १७ गते प्रदेशसभाले प्रदेशको नाम कोशी प्रदेश राखेपछि पहिलोपटक बैठक बस्न लागेको हो ।
