विराटनगर । प्रहरीले नेपाल विद्यार्थी संघ (नेविसंघ) मोरङका अध्यक्ष सरोज पोखरेललाई पक्राउ गरेको छ । पूर्वाञ्चल विश्वविद्यालय सेवा आयोगका अध्यक्ष प्राडा महेश दाहालमाथि कालोमोसो दलेको आरोपमा प्रहरीले उनलाई पक्राउ गरेको हो ।
सुनसरी र मोरङ प्रहरीको संयुक्त टोलीले उनलाई बुधबार बिहान मोरङको बुढीगंगाबाट पक्राउ गरेको हो । प्रहरीका अनुसार अहिले उनलाई जिल्ला प्रहरी कार्यालय सुनसरीमा राखिएको छ ।
नेविसंघका कार्यकर्ताहरुले पूर्वाञ्चल विश्वविद्यालय सेवा आयोगका अध्यक्ष प्राडा दाहालमाथि सोमबार निवासमै पुगेर कालोमोसो दलेका थिए । उक्त घटनाको जिम्मेवारी पोखरेलले लिएका थिए । प्रहरीले कालोमोसो दल्ने घटनामा संलग्न सबैको पहिचान भइसकेको र उनीहरुको खोजी भइरहेको बताएको छ ।
विश्वविद्यालय सेवा आयोगको कार्यालयले कालोमोसो दलेको घटनामा पोखरेलसहित ३ जनाविरुद्ध इलाका प्रहरी कार्यालय इटहरीमा किटानी जाहेरी दिएको थियो ।
