काठमाडौँ । आइसीसी एकदिवसीय विश्वकप क्रिकेट छनोट प्रतियोगिताअन्तर्गत आफ्नो तेस्रो खेलमा नेपालले वेस्ट इन्डिजविरुद्ध टस जितेको छ । जिम्बावेको हरारे स्पोर्ट्स क्लबमा टस जितेर कप्तान रोहित पौडेलले पहिला फिल्डिङ गर्ने निर्णय गरेका हुन् ।
दुई पटकको विश्वकप विजेता वेस्ट इन्डिजसँग नेपालले हालसम्म एउटा पनि खेल खेलेको छैन । नेपालको लागि रोहित पौडेलले कप्तानी गर्नेछन् भने वेस्ट इन्डिजको लागि शाई होपले कप्तानी गर्नेछन् ।
नेपालले आज टोलिमा कुनै परिवर्तन गरेको छैन । आजको खेलमा नेपालले पछिल्लो पटक अमेरिकालाई हराएको टोलीलाई नै निरन्तरता दिएको छ ।
नेपाल पहिलो खेलमा जिम्बावेसँग ८ विकेटले पराजित भएको थियो भने दोस्रो खेलमा अमेरिकालाई नेपालले ६ विकेटले हराएको थियो । यता वेस्ट इन्डिजले पहिलो खेलमा अमेरिकालाई ३९ रनले हराएको थियो ।
नेपालको प्लेइङ–११
आसिफ शेख (विकेटकिपर), कुशल भुर्तेल, भीम सार्की, रोहित पौडेल (कप्तान), कुशल मल्ल, आरिफ शेख, दीपन्द्रसिंह ऐरी, गुलशन झा, करण केसी, सन्दीप लामिछाने र ललित नारायण राजवंशी ।
