काठमाडौँ । काठमाडौँ महानगरपालिकाले सहकारी संस्थालाई साधारणसभा र लेखापरीक्षणलगायतका विवरण ३० दिनभित्र बुझाउन निर्देशन दिएको छ ।
आज एक सूचना प्रकाशित गर्दै महानगरले कानूनी व्यवस्था हुँदाहुँदै पनि केही सहकारी संस्थाले साधारण सभाको जानकारी, लेखापरीक्षण प्रतिवेदनलगायतका बमोजिमका विवरणहरु समयमै पेस नगरेकाले पेस गर्न निर्देशन दिएको हो । तोकिएको ३० दिनभित्र विवरण नबुझाए कानून बमोजिम कारबाही गरिने समेत महानगरले उल्लेख गरेको छ ।
‘काठमाडौँ महानगरपालिका सहकारी ऐन, २०७४ को दफा २८ को उपदफा २ ले संस्थाको साधारण सभा प्रत्येक आर्थिक वर्ष समाप्त भएको मितिले ६ महिनाभित्र बोलाउनुपर्ने, दफा ५४ को उपदफा १ ले आर्थिक वर्ष समाप्त भएको मितिले बढीमा तीन महिनाभित्र प्रचलित कानून बमोजिम इजाजत प्राप्त लेखा परीक्षकबाट संस्थाको प्रत्येक आर्थिक वर्षको लेखा परीक्षण गराउनुपर्ने र दफा ५२ ले तोकिए बमोजिमका विवरणहरु बुझाउनुपर्ने व्यवस्था छ । ऐनको दफा ७९ ले विभिन्न कसुरजन्य कार्यहरु, दफा ८१ ले सजाय, दफा ८२ले जरिवाना र दफा ६६ ले सहकारीको बिघटन वा दर्ता खारेजीको व्यवस्था समेत गरेको छ’, महानगरले भनेको छ ।
