काठमाडौं । ठमेलस्थित चर्चित नाइट क्लब लर्ड अफ ड्रिंक्स (एलओडी) गएकी एक नाबालिका बलात्कार गरेको आरोपमा प्रहरीले एक जनालाई पक्राउ गरेको छ ।
गत ३० जेठमा एलओडी गएकी १६ वर्षीया बालिकालाई बलात्कार गरेको आरोपमा पोखरा घर भइ हाल ललितपुरको बागडोल बस्ने ५० वर्षीय सुदनबहादुर कोइरालालाई प्रहरीले पक्राउ गरेको हो ।
३१ जेठमा आफू बलात्कृत भएको भन्दै पीडितले किटानी जाहेरी दिएपछि कोइरालालाई पक्राउ गरेको जिल्ला प्रहरी परिसर, ललितपुरका एसएसपी सिद्धिविक्रम शाहले जानकारी दिए ।
अनुसन्धानको क्रममा उमेर नपुगि नाबालिगलाई एलओडी प्रवेश दिएको भन्दै प्रहरीले एलओडीका सञ्चालकलाई पनि छानबिनको दायरामा ल्याएको छ । प्रहरीले घटनाबारे छानबिन गर्न एलओडीका साहुहरु रुदिलबल्लव श्रेष्ठ र राजुसिंह सुवालविरुद्ध पक्राउ पुर्जी जारी गरेको छ ।
