काठमाडौं। नेपाली राष्ट्रिय भलिबल टोलीको नयाँ कप्तानमा मानबहादुर श्रेष्ठ चुनिएका छन् । नेपाल भलिबल संघको सोमबार बसेको कार्यसमिति बैठकले मानबहादुरलाई कप्तानको जिम्मेवारी दिइएको हो ।
त्रिभुवन आर्मी क्लबबाट घरेलु भलिबल खेल्दै आएका मानबहादुर ८ वर्षदेखि राष्ट्रिय टोलीमा खेल्दै आएका छन् । उनले यसअघि पनि आर्मीको कप्तानी गरिसकेका छन् ।
यसअघि भलिबल संघले हरिहजुर थापालाई कप्तानबाट बर्खास्त गरेको थियो । गत सोमबार भएको सातौं प्रधानमन्त्री कप एनभीए महिला तथा पुरुष राष्ट्रिय क्लब लिगअन्तर्गत गण्डकी प्रदेशविरुद्ध खेलका दौरान हरिहजुर दर्शकतर्फ आक्रोशित भएको र कप्तानको भूमिका राम्रोसँग निर्वाह नगरेको भन्दै संघले कारवाही स्वरुप उनको पद खोसिएको थियो ।
संघले शनिबार हरिहजुरलाई बर्खास्त गरेपछि सोमबार नै कार्यसमितिले नयाँ कप्तान चयन गरेको हो । नेपालले अब मानबहादुरकै कप्तानीमा एसियाली खेलकुदमा सहभागिता जनाउनेछ ।यससँगै मानबहादुर राष्ट्रिय पुरुष भलिबल टोलीको ११ औं कप्तान बनेका छन् ।
मानबहादुर यसअघि पनि नेपाली टोलीको कप्तान थिए। उनले १३ औं दक्षिण एसियाली खेलकुदमा राष्ट्रिय भलिबल टोलीको कप्तानी गरेका थिए । गत वर्ष उनकै कप्तानीमा काभा भलिबलमा नेपाललाई दोस्रो स्थान दिलाएका थिए ।
