एजेन्सी । फिल्म ‘कुछ कुछ होता हे’ मा शाहरुख खान र काजोलका अलावा रानी मुखर्जी पनि महत्वपूर्ण भूमिकामा देखिएकी थिइन् । फिल्ममा उनी टीनाको भूमिकामा थिइन् । रानी मुखर्जी बताउँछिन् कि त्यतिबेला उनी १७ वर्षकी मात्र थिइन् ।
यति सानो उमेरमा आमाको भूमिका निर्वाह गर्नु उनका लागि निकै चुनौतीपूर्ण थियो । रानी मुखर्जीको यो भिडियो सामाजिक सञ्जालमा निकै भाइरल भइरहेको छ ।
भाइरल भिडियोमा रानी मुखर्जीले टिनाको क्यारेक्टर खेल्नु त्यतिबेला उनको लागि सबैभन्दा चुनौतीपूर्ण रहेको बताइन् । अभिनेत्रीले भनिन्, ‘जब म १७ वर्षको थिएँ, मैले ‘कुछ कुछ होता हे’ मा आमाको भूमिका निभाएकी थिएँ । तर, धन्यबाद, त्यो फिल्ममा म ‘घोस्ट मम’ थिएँ ।’
कतिपय प्रयोगकर्ताले फिल्म रिलिज हुँदा रानी १७ नभई २० वर्षकी रहेको बताएका छन् । यसैबीच, उनले फिल्ममा निकै कम स्क्रिन टाइम पाएकी थिइन् । त्यसमा के चुनौतीपूर्ण थियो भन्ने कुरालाई लिएर केही मानिसहरुले मजाक पनि बनाइरहेका छन् ।
एक प्रयोगकर्ताले लेखेका छन्, ‘रानीको जन्म सन् १९७८ मा भएको थियो । केही कुछ होता है सन् १९९८ मा रिलिज भएको थियो । त्यसोभए उनी १७ वर्षकी कसरी भइन् ?’ त्यही क्रममा एक प्रयोगकर्ताले लेखे, ‘फिल्म रिलिज हुँदा रानी २० वर्षकी थिइन् । यस्तो अवस्थामा उनी सुटिङको समयमा १८ वा १९ वर्षको हुनुपर्छ ।
कामको कुरा गर्दा रानी पछिल्लो पटक फिल्म ‘मिसेस चटर्जी भर्सेस नर्वे’ मा देखिएकी थिइन् ।
